Tin hende ta skohe pa un atmishon boluntario den Klínika capriles, otro ta keda atmití obligatoriamente. Tin bia ta trata di urgensia, i un médiko ta disidí ku un atmishon ta nesesario. I tin bia ta wes ta dikta ku un kliente ku ta bou di kuratela mester di un time-out. E klínika ta traha huntu ku bo na kresementu i rekuperashon.
Tin bia bo mester di un time-out pasó bo problemanan ta resultá persistente i bo mes no ta sali afó mas. Kon drástiko ku e por ta, un atmishon den klínika ta duna bo e oportunidat pa den un ambiente safe, traha riba bo rekuperashon. Si bo ta bai di akuerdo ku e proposishon pa atmishon, nos ta papia di un atmishon boluntario. Bo no ta warda te ora tin un krísis serio, pero bo ta tuma kontakto ku bo dòkter di kas òf spesialista promé ku emergensia presentá.
Un intervenshon di krísis por kondusí na un atmishon inboluntario. Esaki ta sosodé solamente den kaso ku bo ta forma un peliger pa bo mes òf pa otronan. Un atmishon obligá no por asin’asina. Tin un prosedura konsiensudo ku ta ankrá den lei. Intenshon ta ku, mas lihé posibel, bo bira un poko mas trankil atrobe (stabilisá ta yama esei) i ta siña haña un balans nobo. Ora bo ta stabil atrobe, ta hasi palabrashonnan ku bo tokante kon sigui i bo plan di tratamentu.
Si un dòkter ta haña ku intervenshon imediato ta nesesario, e ta papia di un intervenshon di krísis. E por intervení den un krísis kaminda bo ta trastorná òf por ehèmpel agresivo. Por ta ta bira violento riba kaya òf na kas i mester yama polis. E peliger akí por ta pa esun konserní mes tambe, manera den kaso di un posibel matamentu di kurpa òf un sikósis. Warda te ora por ehèmpel e dòkter di kas tin ora di konsulta no por e or’ei. E intervenshon di krísis mes tin bia ta duna sufisiente solushon, pero hopi bia ta un fase di transishon pa kuido regular.
Ora bo ta bou di kuratela, ta deklará bo ‘inkapas na aktua’. Esaki ta nifiká ku bo mes no mag tuma desishonnan práktiko sin permit di bo kuratòr. Ounke un hende ta 18 aña bai ariba, pa por ehèmpel sera un kontrakt di kompra òf hür, mester di permit di su kuratòr. Meta di kuratela ta pa protehá e persona konserní riba tereno personal i finansiero. E prosedura akí ta ankrá den lei.